Hvatningarverðlaun Heimilis og skóla
18. maí 2012
Þau ánægjulegu tíðindi bárust okkur í skólann á miðvikudag að Þorpið þekkingarsamfélag hefði hlotið hvatningarverðlaun Heimilis og skóla 2012.
Þorpið þekkingarsamfélag er þróunarverkefni sem hófst haustið 2011. Markmið verkefnisins er að byggja upp traust og samvinnu á jafningjagrunni, þar sem foreldrar ræða um, styðja, efla og finna, ásamt skólanum nýjar og árangursríkar leiðir innan Laugarnesskóla til að auka vellíðan barna. Langtímamarkmið verkefnisins er að ýta undir opnari umræðu og þekkingu meðal foreldra um líðan barna í Laugarnesskóla og samfélaginu öllu.
Með auknu samstarfi foreldra og skóla er stefnt að því að nýir möguleikar og farsælar leiðir festi sig í sessi og stuðli að bættri vellíðan allra barnanna í hverfinu og foreldra þeirra.
Ábyrgðarmaður verkefnisins er Ragnheiður Kristinsdóttir, iðjuþjálfi og foreldri í Laugarnesskóla. Ragnheiður hefur reynslu af því að eiga barn í skólanum sem hefur þurft aukinn stuðning. Hún hefur einnig starfað í mörg ár sem iðjuþjálfi og hefur góða reynslu af því að nýta jafningjastuðning og þekkingarmiðlun til að efla hlutverk, auka þátttöku og bæta vellíðan fólks.
Á myndinni eru með Ragnheiði þær Þórunn Borg Ólafsdóttir, Helga Björg Dagbjartsdóttir og Sigurrós Einarsdóttir, en allar hafa þær starfað ötullega í Þorpinu.
Skólablað Laugarnesskóla er komið út. Blaðið inniheldur meðal annars bekkjarmyndir og verk eftir nemendur. Blaðið er litríkt og gaman að sjá hversu skapandi krakkarnir í Laugarnesskóla eru. Þetta er 67. árgangur blaðsins og kom fyrsta skólablaðið út árið 1946. Blaðið kostar 800 kr. og er til sölu hjá ritara. Allur ágóði af útgáfunni rennur til uppbyggingar á skólasetrinu í Katlagili.
Í gær fóru nemendur 1. bekkjar í vettvangsferð í Katlagil. Auk hefðbundinna vorstarfa á staðnum var farið í gönguferð. Nemendur 1. S sýndu þann dugnað að þau fóru í fjallgöngu og gengu allla leið upp á Grímannsfell. Þaðan er gott útsýni eins og sjá má á myndinni og göngugarparnir nutu þess í björtu en köldu veðri.